ရွှေသာလျောင်း တောင်တော် သည် မန္တလေးတိုင်း‌ဒေသကြီး၊ ကျောက်ဆည်မြို့နယ်၏ အ‌ရှေ့ဘက် ကပ်လျက်တွင် တည်ရှိ၍ ရွှေသာလျောင်းတောင်တော် အမြင့်မှာ ( ၉၇၅ ) ပေ မြင့်ပါသည်။ တောင်တော်၏ အမည်များမှာ ကိုးခရိုင် သမိုင်းတွင် အောက်ပါအတိုင်း ‌ဖော်ပြထားပါသည်။

( ၁ ) ကကုသန် ဘုရားရှင် လက်ထက်တွင် ရတနာဝိပ္ပတောင် ဟု အမည်တွင်လေသည်။

( ၂ ) ကောဏဂုံ ဘုရားရှင် လက်ထက်တွင် ရသေ့ငါးရာ နေထိုင်ကြသောကြောင့် ဣသိသေဌ တောင်ဟု အမည်တွင်လေသည်။

( ၃ ) ကဿပ ဘုရားရှင် လက်ထက်တော် ဤ‌တောင်၌ စန္ဒာကူး နံ့သာနှစ်များစွာ ပေါက်ရောက်ခြင်းတို့ကြောင့် ကိန္နရာများစွာတို့ လာရောက်နေထိုင်သည်ကို အကြောင်းပြု၍ ကိန္နရာ စမ္ပာရတောင် ဟု အမည်တွင်လေသည်။

( ၄ ) ဂေါတမ ဘုရားရှင် လက်ထက်တော်တွင် ကကုသန်၊ ကောဏဂုံ၊ ကဿပ၊ ဂေါတမ ဟူသော ဘုရားလေးဆူတို့၏ ဘွဲ့တော်များပေါင်း၍ စတုရတန ရာသိဗ္ဗတ တောင်ဟု အမည်တွင်လေသည်။

( ၅ ) ဂေါတမ ဘုရားရှင် လျောင်းတော်မူဟန် သဏ္ဍန်ကို အကြောင်းပြု၍ ရှင်ပင်သာလျောင်း တောင်ဟု အမည်တွင်ခဲ့ပါသည်။ ထိုမှ ရွှေသားဖြင့် လျောင်းတော်မူ ဖြစ်ခြင်းကြောင့် ရွှေသားလျောင်းတောင်ဟု ခေါ်ဆိုစေသည်။ နှစ်ကာလ ရွေ့လျားလာသည့်အခါ ရွှေသားလျောင်းတောင် ကို ရွှေသာလျောင်းတောင် ဟု ပြောင်းလဲလာခဲ့ပါသည်။



ဘုရားအဆူဆူ တို့ လက်ထက်ကပင် ရှိခဲ့‌သော ထူးမြတ်သောတောင် ဖြစ်ပါသည်။